MGOGORO WA SUDAN YA KUSINI UNATISHA-BAN KI MOON

Wawakilishi wa Kudumu kutoka nchi 193 wanaoziwakilisha nchi zao katika Umoja wa Mataifa, wakimsikiliza  Katibu Mkuu wa Umoja wa Mataifa, Ban Ki Moon wakati alipolizungumza Baraza Kuu la Umoja wa Mataifa  siku ya Ijumaa.  Alitumia  fursa hiyo,  kuainisha vipaumbele vyake vya mwaka 2014,  mafanikio na changamoto zinazoukabili Umoja wa Mataifa ikiwamo migogoro inayoendelea huko Sudan ya Kusini,   Jamhuri ya Afrika ya Kati  na kwingineko Duniani. Akatahadharisha kwamba  kama  Jumuiya ya Kimataifa  haitakuwa makini kuna hatari kubwa ya kutokea   mauaji makubwa ya  raia kama ambavyo imeshawahi kutokea huko nyuma

Na Mwandishi Maalum, NewYork
Kufuatia machafuko na migogoro inayoendelea katika nchi za Sudani ya Kusini, Afrika ya Kati, Mali na maeneo mengine  duniani, Katibu Mkuu wa Umoja wa Mataifa  ameitaka jumuiya ya kimataifa kuwa makini na kuchukua  tahadhari ya juu.

Amesema kuna ukiukwaji mkubwa  wa haki za binadamu katika maeneo hayo jambo analosema hali ikiendelea kama ilivyo sasa kuna hatari kubwa ya kutokea mauaji makubwa ya raia kama ambavyo  dunia imeshuhudia katika miaka iliyopita.

 Ban Ki Moon, ametoa tahadhari hiyo, mwishoni mwa wiki, wakati alipolizunguza  Baraza Kuu la  Umoja wa Mataifa  .  Ambapo  alitumia fursa hiyo kuainisha  malengo  na vipaumbele vyake na Umoja wa Mataifa kwa ujumla kwa mwaka huu wa 2014.

“Kuna mambo ambayo tunapashwa kuwa makini nayo na kuchukua tahadhari kubwa, mgogoro unaoendelea  katika Sudan ya Kusini  umefikia  kuwango cha kutisha. Kuna  ukiukwaji  mkubwa wa haki za binadamu “ akasema Ban Ki Moon.

Na kuongeza kwamba kufuatia mgogoro huo Umoja wa Mataifa  ulifungua  milango ya Kambi ya Kulinda Amani katika Sudan ya Kusini ( UNMISS) na kuwahifadhi maelfu ya raia waliokuwa katika hatari kubwa ya kupoteza maisha yao.

“ Wengi wao leo hii wako hai ni kwasababu tu, waliwahi kukimbia kwa wakati na  kufika kwenye  makambi yetu. Tunajitahidi kadri tuwezavyo pamoja na uwezo wetu mdogo kuwa hudumia, lakini hali ni mbaya na mazingira ni ya kutisha” akasisitiza.

Pamoja na kuendelea  na jukumu la utoaji wa misaada kwa raia ambao wameyakimbia makazi yao, Mkuu huyo wa Umoja wa mataifa anaeleza kwamba, jitihada za kutafutu suluhu ya kisiasa kwa mgogogo huo inaendelea.

Akatumia fursa hiyo kuwashukuru viongozi wa nchi za IGAD ( Intergovernmental Authority for Development ) na Umoja wa Afrika ( AU) kwa juhudi zao za kusimamia mazungumzo ya kutafuta suluhu.

Aidha katibu Mkuu amezitaka pande zinazohusika kumaliza tofauti zao kwa njia ya mazugumzo na kuonya kwamba Ofisi ya Kamishna ya Haki za Bindamu inafuatilia kwa karibu sana kuhusu ukiukwaji wa haki za binadamu  katika nchi hiyo .

Kwa upande wa Jamhuri ya Afrika ya Kati, Mkuu huyo wa Umoja wa Mataifa, ameelezea wasiwasi wake kuhusu mwenendo wa mambo unavyoendelea yakiwamo mauaji holela ya raia.

Akazishukuru nchi zinazounda Jumuiya ya Kiuchumi ya Mataifa ya Afrika ya Kati ( ECCAS) pamoja na Ufarasa kwa juhudi zao  za kuwasaidia raia wa  nchi hiyo pamoja na kurejesha hali ya amani na utulivu. Nakuonya kwamba wale wote wanaouhusika na ukiukwaji wa haki za binadamu lazima watawajibishwa.

Kuhusu Jamhuri ya Kidemokrasia ya Kongo ( DRC)  Katibu Mkuu ameeleza kuwa  uwepo wa Brigedi Maalum ( FIB) katika eneo la Mashariki ya Nchi hiyo, kumesaidia sana katika  kuweka sawa mambo ikiwa ni pamoja na kupunguza  kujirudia kwa machafuko ya mara kwa mara.

Akasisitiza kwamba Jumuiya ya Kimataifa inapashwa  kutumia hali ya utulivu iliyopo hivi sasa katika eneo hilo, kutekeleza Mpango Mpana wa Umoja wa Mataifa kuhusu siasa, amani na maendeleo katika DRC na  Maziwa  Makuu.

Pamoja na kuzungumza migogoro inayoendelea katika baadhi ya nchi za Afrika, Mkuu huyo wa Umoja wa Mataifa pia alielezea wasi wasi wake kuhusu  sintofahamu zinazoendelea katika baadhi ya nchi za Asia na Ulaya  hususani  muendelezo wa chuki na uhasama kwa kimsingi ya tofauti za dini, na ukabila.

Akagusia pia  migogoro inayoendelea katika Mashariki ya Kati hususani katika nchi za Syria, Misri na mgogoro kati ya  Israel na Palestina.

Katika  hatua nyingine, Katibu Mkuu  Ban Ki Moon, amesema Umoja wa Mataifa, haupashwi kuziomba  au kuzibembeleza  nchi wanachama pale unapohitaji kupatiwa  wanajeshi, polisi au vifaa wakati ambapo raia wasiokuwa na hatia wakiendelea kuteseka na kupoteza maisha.

Akasisitiza kwamba Umoja wa Mataifa ni chombo muhimu  ambapo maamuzi mengi yamekuwa yakifanyika lakini akasema anatiwa shaka  na baadhi ya  misimamo ya  viongozi au nchi zenye ushawishi mkubwa.

Pamoja na kuelezea matatizo ya kisiasa na kiusalama na changamoto zake, pia aliainisha  baadhi ya mafanikio ya chombo hicho katika mwaka uliopita na kazi kubwa iliyombele yake na hasa likiwamo jukumu ya utayarishaji wa  malengo mapya ya maendeleo endelevu baada ya mwaka 2015.