Benki ya Exim yaikabidhi Shule ya Msingi Kilakala maabara ya kompyuta

 Meneja wa Benki ya Exim, Tawi la Temeke Bi Joyce Sinamtwa (wakwanza kushoto) akiwaelekeza wanafunzi wa Shule ya Msingi Kilakala jinsi ya kutumia kompyuta mara baada ya kuzindua maabara ya kompyuta iliyowekwa na benki hiyo katika Shule hiyo iliyopo wilayani Temeke jijini Dar es Salaam jana. (Picha na mpiga picha wetu).

 Meneja wa Benki ya Exim, Tawi la Temeke Bi Joyce Sinamtwa (wapili kushoto) akipeana mkono na Mwalimu Mkuu wa Shule ya Msingi Kilakala Abdul Kuratasa mara baada ya kuzindua maabara ya kompyuta iliyowekwa na benki hiyo katika Shule hiyo iliyopo wilayani Temeke jijini Dar es Salaam jana. 

Meneja wa Benki ya Exim, Tawi la Temeke Bi Joyce Sinamtwa (wapili kushoto) akikata utepe kuzindua maabara ya kompyuta iliyowekwa na benki hiyo katika Shule ya Msingi ya Kilakala iliyopo wilayani Temeke jijini Dar es Salaam jana. Akishuhudia ni Mwalimu Mkuu wa Shule ya Msingi Kilakala Abdul Kuratasa.

IKIWA ni sehemu ya shughuli zake za kijamii katika kukuza uwezo wa maendeleo miongoni mwa vijana nchini Tanzania, Benki ya Exim Tanzania, ambayo inaamini kuwa ugunduzi ni maisha, imekabidhi maabara ya kompyuta katika Shule ya Msingi Kilakala iliyopo Wilayani Temeke katika Mkoa wa Dar es Salaam. Akizungumza wakati wa hafla ya makabidhiano hayo iliofanyika jana shuleni hapo, Meneja wa Benki ya Exim Tawi la Temeke, Bi Joyce Sinamtwa alisema kuwa msaada huo wa maabara ya kompyuta, unadhihirisha jitihada za Benki ya Exim katika kuwajengea uwezo vijana wa kitanzania kwa kuwekeza kuwa rasilimali watu bora katika siku za usoni.

Alisema, "Mbali na maktaba iliyowekwa mwaka jana, maabara hii ya kompyuta pia itasaidia kuwaletea maendeleo watoto hawa na kuonyesha dhamira yetu ya kuwekeza katika viongozi wa baadaye wa taifa hili. Baadhi ya wanafunzi hawa wana uwezo mkubwa wa kufikiri lakini wanakosa fursa ya kupata vifaa kama hivi vya kielimu. Benki ya Exim imeamua kuwajengea uwezo zaidi katika kuwafungulia njia wanafunzi hawa ili kukabiliana na changamoto za kimaendeleo hapo baadaye.” Bi. Sinamtwa alisema kuwa uongozi wa benki yake unaamini kwamba kwa kuweka maabara hiyo ya kompyuta katika shule hiyo, wanafunzi wengi wataweza kutumia fursa hiyo kuendeleza ujuzi wao na hivyo kuwa wabunifu katika maisha yao ya kila siku.

Bi Sinamtwa alibainisha kuwa tangu benki hiyo ilipoichukua shule hiyo na kuwa kama mlezi wake mnamo Agosti 2012,shule imekuwa ikipiga hatua zaidi kutokana na misaada mbali mbali iliyotolewa na benki hiyo, ambayo ni pamoja naukarabati wa miundombinu, kutoa madawati, vitabu na vifaa vingine vya kitaaluma.Naye, Mwalimu Mkuu wa Shule ya Msingi Kilakala Bw. Abdul Kuratasa alisema, "Ni dhana nzuri ya kuwajengea mazingira mazuri watoto kuwa wataalam katika sekta ya sayansi na teknolojia na kuendana na mabadiliko ya dunia. Sasa nao pia wana nafasi ya kushindana vilivyo na wanafunzi kutoka shule binafsi. Tunawashukuru Benki ya Exim kwa uwekezaji huukwa watoto."

Bw. Kuratasa alisema mradi huo utawaletea watoto hao manufaa makubwa, kuongeza kuwa kabla ya hapo baadhi ya wanafunzi hawakujua kompyuta inaonekanaje, ila sasa wamepata maabara ya kompyuta safi kutoka Benki ya Exim.

"Wanafunzi wa Kilakala kwa kupitia msaada toka kwa walimu na wataalam wa IT sasa wamepata fursa ya kujifunza kompyuta. Tunashukuru sana na kujiona kama shule yenye bahati kuwa na mradi huu," alisema.

Akitoa maoni yake juu ya msaada huo, Mwanafunzi wa Darasa la Sita wa Shule ya Msingi Kilakala Nasra Abeid alisema,"Hii ni nafasi tuliyokuwa tukiisubiria kwa muda mrefu. Sasa tunaweza kuwa na uhakika wa kutumia kompyuta kabla ya kwenda shule ya sekondari, hii imekuwa ndoto ya kweli kwetu. Tunashukuru sana."