WAZIRI WA UJENZI DKT. JOHN POMBE MAGUFULI AKAGUA DARAJA LA NANGOO PAMOJA NA UJENZI WA BARABARA YA NDUNDU –SOMANGA NA KUMPA MUDA WA MIEZI MIWILI MKANDARASI ANAYEJENGA BARABARA HIYO KUMALIZA KAZI HARAKA.

Waziri wa Ujenzi Dkt. John Pombe Magufuli wakwanza kulia akipita juu ya daraja la Nangoo Wilayani Masasi wakati wa ukaguzi huku akifatiwa na  Mtendaji Mkuu wa TANROADS Mhandisi Patrick Mfugale, Katibu Mkuu Wizara ya Ujenzi Mhandis Mussa Iyombe pamoja na Mwakilishi kutoka  Benki ya Maendeleo ya Africa (ADB) Bi Tonia Kandiero

 

NA MWANDISHI MAALUM, MTWARA

Waziri wa Ujenzi Dkt. John Pombe Magufuli amempa muda wa miezi miwili mkandarasi anayejenga barabara ya Ndundu-Somanga kufanya kazi usiku na mchana ili kumaliza kazi hiyo haraka bila kutoa visingizio vyovyote.

Waziri wa Ujenzi aliitoa kauli hiyo leo katika kijiji cha Manzese,  Wilayani Kilwa mkoani Lindi wakati alipofanya ziara ya kushtukiza katika eneo hilo la ujenzi.

Aidha, Dkt. Magufuli alisema kuwa mkandarasi huyo ameshalipwa fedha zote alizokuwa ana dai hivyo anachotakiwa ni kufanya kazi kila siku  usiku na mchana  ili amalize kazi hiyo haraka,

“Tunataka mpaka mwezi wa tisa, tuone barabara ya lami na sio vinginevyo, wahandisi wote wa mkoa wa Pwani na Lindi wamsimamie kwelikweli na kwa muda wote ili aweze kukamilisha kazi hii kwa muda tuliompa” Alisema Waziri Magufuli.

Pia waziri wa Ujenzi aliwaasa Wananchi kutomwibia Mkandarasi huyo Mafuta ili aweze kukamilisha kazi hiyo kwa wakati.

“Msiibe mafuta kwa mkandarasi pia nayeye anatakiwa awalipe vizuri wafanyakazi wake kwasababu sisi pia tunamlipa vizuri, pia anatakiwa atunze vifaa vyake vizuri” alisema Waziri Magufuli.

Kuhusu barabara ya kutoka Lindi kuelekea Mtwara katika baadhi ya maeneo, Waziri Magufuli amewataka viongozi wa mkoa kusimamia malori yanayobeba gipsam na mawe makubwa kupita kiasi hali inayohatarisha usalama wa barabara hiyo.

Sehemu ya barabara ya Ndundu Somanga kama inavyooneka baada ya mkandarasi kuanza kufanya kazi kwa kasi tofauti na hapo awali

Waziri wa Ujenzi Dkt. John Pombe Magufuli akihutubia wananchi wa kijiji cha Manzese kuhusu Mkandarasi anayejenga barabara katika eneo hilo la Ndundu Somanga kuwa anatakiwa ndani ya miezi miwili awe amekamilisha barabara ya lami bila visingizio vyovyote.

Waziri wa Ujenzi Dkt. John Pombe Magufuli akihutubia mbele ya viongozi mbalimbali kutoka Mkoa wa Pwani na Wizara ya Ujenzi, ADB na wakandarasi kuhusu ujenzi wa barabara ya Ndundu Somanga baada ya kufanya ziara ya kushtukiza kufanya ukaguzi wa maendeleo ya ujenzi wa barabar hiyo

Waziri wa Ujenzi Dkt. John Pombe Magufuli akisalimiana na wananchi mara baada ya kuhutubia wakazi wa Manzese katika barabara ya Ndundu Somanga mkoani Lindi

Waziri wa Ujenzi Dkt. John Pombe Magufuli akitoa maelekezo kwa mkandarasi anayejenga barabara ya Ndundu Somanga kuhusu kumalizia kipande cha kilometa kumi kilichobakia ndani ya muda wa miezi miwili…Picha zote kwa Hisani ya Kitengo cha Mawasiliano-GCU-UJENZI