.

IDADI YA WALIOFARIKI TETEMEKO LA ARDHI ITALIA YAFIKIA WATU 247

Aug 25, 2016

Huku timu za uokoaji zikiendelea na kazi ya kuwatafuta majeruhi na manusura wa tetemeko la ardhi lenye ukubwa wa 6.2 kwa kipimo cha rishta lililotokea katikati mwa Italia, hadi sasa imethibitishwa kuwa watu wasiopungua 247 wamepoteza maisha katika janga hilo la kimaumbile.
Hadi kufikia asubuhi ya leo, idadi ya majeruhi imeripotiwa kuwa ni watu 368, baadhi yao wakiwa katika hali mahututi huku idadi ya vifo ikitazamiwa kuongezeka. 
Kwa muda wote wa usiku wa kuamkia leo, timu za uokozi zimekuwa zikijaribu bila matumaini kuwatafuta majeruhi na manusura wa tetemeko hilo chini ya vifusi vya majengo yaliyoporomoka.
Tetemeko la ardhi la jana karibu na mji wa Norcia ulioko kwenye eneo la Umbria katikakati mwa Italia lililotokea kabla ya mapambazuko lilisomba nyumba na kubomoa barabara katika eneo la milimani kilomita 140 mashariki mwa mji mkuu wa Italia, Rome.
Watu wakiamua kubaki nje kwa kuhofia tetemeko jengine la ardhi
Mamia ya watu walipitisha usiku wa baridi jana kwenye mahema nje ya nyumba zao kwa kuhofia hatari ya athari za baada ya tetemeko kuu.
"Usiku huu utakuwa usiku wetu wa kwanza wa jinamizi" alisema Alessandro Gabrielli, mmoja wa mamia ya watu waliokuwa wakijiandaa kulala nje kwenye mahema jana usiku na kwenye bustani za mji wa Amatrice, ambao nyumba zao zimebomolewa na zilzala.
Sergio Pirozzi, Meya wa mji huo wa Amatrice ulioathriwa vibaya zaidi na tetemeko la ardhi amesema, viwiliwili saba tu vimepatikana kwenye hoteli moja ya mji huo iliyoporomoka ikiwa imepokea wageni wapatao 70.
 
Shughuli za uokozi zikiendelea
"Nusu ya mji imetoweka", ameeleza Meya Pirozzi.
Mbali na mji huo, miji mingine iliyoathiriwa vibaya na zilzala ya alfajiri ya jana ni Accumoli, Posta na Arquata del Tronto.
Tetemeko kubwa la ardhi na la mwisho kutokea nchini Italia lilikuwa la mwaka 2009 lililoukumba mji wa katikati mwa nchi hiyo wa L'Aquila na kuua watu zaidi ya 300.../

0 Comments:

Post a Comment

Toa Maoni kistaarab kwa Hoja kwa faida ya wenzako. au tundikie kupitia nkoromo@gmail.com, simu 0672223269

ยช