HABIBA KAWAWA, MTOTO WA SIMBA WA VITA AMEFARIKI DUNIA

HABIBA Rashid Kawawa, Binti wa Simba wa Vita, Marehemu Mzee, Rashidi Kawawa amefariki dunia.
     Taarifa ambazo blog hii imezipata zimesema amefariki jana jioni wakati akijifungua, katika hospitali ya taifa Muhimbili, Dar es Salaam.  Marehemu Habiba, alikuwa ni mwanasheria wa Jiji la Dar es Salaam aliyekuwa akifanyakazi katika mahakama ya jiji hilo.
     Venance Mkude ambaye alikuwa mmoja wa wasaidizi wa Mzee Kawawa, alisema, mipango ya mazishi inafanyika nyumbani kwa mume wa marehemu aliyemtaja kwa jina moja la  Maleko, Tegeta, Dar es Salaam. "hivi sasa ndiyo tunaenda kukutana wanafamilia kupanga namna ya mazishi' tutakutana saa nne pale nyumbani kwa mume wa marehemu hapo Tegeta", alisema Mkude.
  Habiba ambaye amefariki ikiwa ni mwezi mmoja tangu kufariki Mzee baba yake aliyefariki Desemba 31, mjini Dar es Salaam, huenda mazishi yake yakafanyika Moshi mkoani Kilimanajaro ambako ni nyumbani kwa wazazi wa mumewe.
  Marehemu Habiba alikuwa ni mtoto wa tano, kati ya wale waliozaliwa na Mzee Kawawa kupitia kwa Mama Asiya Kawawa ambaye pia ni marehemu.
   Chachandu Daily itakupasha baadaye kinachoendelea kuhusiana na msiba huu