MWIGUKLU NCHEMBA AZURU ENEO LA MAPIGANO YA WAKULIMA NA WAFUGAJI HUKO MOROGORO

Waziri wa Kilimo, Mifugo na Uvuvi, Mwigulu Nchemba, akimjulia hali mmoja wa majeruhi kwenye hospitali wilayani Mvomero wakati wa ziara yake ya kutembelea eneo palikozuka  mapigano baina ya wakulima na wafugaji kwenye kijiji cha Dihinda wilayani humo leo Desemba 14, 2015

WAZIRI wa Kilimo, Mifugo na Uvuvi, Mh. Mwigulu Nchemba, leo Desemba 14, 2015 ametembelea eneo palikozuka mapigano ya wakulima na wafugaji wilayani Mvomero Mkoani Morogoro ambapo mtu mmoja aliuawa. Akiandika kwenye ukurasa wake wa Facebook, Waziri alioanza kwa kusema, "Mgogoro wa wakulima na wafugaji hii leo nimefika Mvomero, kijiji cha Dihinda kata ya Kanga kufuatilia na kuchukua hatua dhidi ya tukio la mauaji, kujeruhi binadamu na wanyama lililotokea Desemba 12, 2015." Alisema, na kuongeza "Natoa rai kwa wananvhi hususan wa jamii ya wafugaji na wakulima, hakuna ardhi au mnyama mwenye thamani sawa na maisha ya mwanadamu yeyote yule, njia bora na salama ya kutatua migogoro hii inayohusisha wakulima na wafugaji ni kufuata taratibu za kuonana na uognozi wa serikali wa eneo husika hatua kwa hatua. " alifafanua. Waziri alifika ili kujione uharibifu mbalimbali ikiwa ni kuuliwa kwa mifugo.

Kadhia hiyo iliyotokea kijiji cha Dihinda wilayani humo, tayari imepelekea kifo cha mwananchi mmoja huku askari polisi wawili na wananchi wengine wane wakijeruhiwa.

Waziri alishuhudia mifugo kadhaa iliyouwawa ikiwa imetapakaa kwenye eneo moja, hali kadhalika alitembelea hospitalini kuwapa pole majeruhi.

Akiongozana na Mbunge wa Mvomero Mh. Sadick Mourad, Mh. Waziri aliwataka wananchi hao kuacha kujichukulia sheria mkononi.

Katika kujaribu kulitafutia ufumbuzi tatizo hilo linalojirudia mara kwa mara, Mh. Waziri ameunda kamati za usuluhishi wa migogoro ya ardhi kwa kila kijiji wilayani humo ambapo zitahusisha makundi yote mawili yaani wakulima na wafugaji ili kubaini wavamizi wa maeneo na kuwachukulia hatua haraka iwezekanavyo. Waziri alifuatana na Mkuu wa wilaya ya Mvomero, Betty Mkwasa.