.

TUITUNZE DUNIA MAMA ILI TUENDELEE-:IGIRO

Apr 22, 2011

Dk. Asha-Rose Migiro

Na Mwandishi Maalm, New York
Maendeleo endelevu ya  mamia ya mamilioni ya watu katika Asia, Amerika ya Kusini na Afrika, ambao wamejitahidi kujiondoa  kutoka lindi la umaskini, hayawezi kuwa endelevu kama mazingira asilia ya   Mama Dunia yataendelea kuharibiwa.
Naibu Katibu Mkuu wa Umoja wa Mataifa, Asha-rose Migiro ameyasema hayo wakati  Jumuia ya Kimataifa, ilipoadhimisha hapo siku ya jumatano, siku ya kimataifa ya Mama Dunia. Huku akisema kuwa dunia katika miongo miwili iliyopita imepitia mabadiliko makubwa yakiwamo ya kuinukia kiuchumi kwa baadhi ya mataifa.
“ Mamia ya mamilioni ya watu wetu katika Asia,  Amerika ya kusini na hususani Afrika wamejitahidi kuondokana na umaskini.” Akabainisha Migiro na kuongeza “ tunahitaji kutawanya mafanikio hayo kwa mamia ya milioni zaidi ya watu kwa kuwapatia ajira zenye heshima, mazingira safi, nishati nafuu pamoja na faida zote za kijamii na  kiuchumi zinazoweza kuharakisha maendeleo yao”.
Akasema  wakati jumuia ya kimataifa ikiadhimisha siku hiyo ya Mama Dunia, kunahitajika  kuwapo kwa   mtizamo wa jumla wa suala zima la  mazingira, kijamii na kiuchumi kwa sababu hayo  ndiyo msingi mkuu katika kuleta maendeleo endelevu.
Hata hivyo anasema, amendeleo endelevu hayo hawezi kufikiwa bila kuheshimu makazi asili ya binadamu ambayo ni muhimu kwa  mafanikio na ustawi wao.
Naibu Katibu Mkuu amewaeleza washiriki wa maadhimisho hayo ambayo yamefanyika makao makuu ya Umoja wa Mataifa kwamba,  mwaka 2009 Baraza kuu la UM liliitangaza April 22 kuwa siku ya  kimataifa ya Dunia Mama.  Mkazo ukiwa  katika kusisitiza   uwiano kati ya mahitaji ya kiuchumi, ya kijamii na kimazingira  kwa  maslahi  ya  sasa na vizazi vijavyo, pamoja na  kwa kukuza maelewano kati  binadamu , mazingira ya asilia na ardhi.
Amesema kuwa athari za  uharibifu wa mazingira asilia ya Mama dunia ziko wazi na zinatokana na matendo na kazi za mwanadamu mwenyewe.
Anazitaja athari hizo  ambazo  anasema zinaweza kabisa kubadilisha mwenendo wa dunia katika kuhimili  maendeleo  ya mwanadamu , kuwa ni  pamoja na uchafuzi wa vyanzo vya mji,upotevu wa bioanuwai, ukataji wa misitu, uharibifu wa tabaka la Ozon na mabadiliko ya tabia nchi.
Migiro anasema ,nchi zinaweza kuharibu misitu yake, zinaweza kutokomeza samaki  na viumbe hai  wengine.Lakini katika kuangalia faida chanya ya pato lake la taifa hasara hiyo  ya  uharibifu wa mazingira na viumbe hai  haiigizwi kwenye vitabu vya hesabu.
“ Tunajali  zaidi faida itokanayo na mauzo ya silaha pamoja na kutumia mabilioni mengi ya dola kwa mwaka kwaajili ya kufidia makaa ya mawe, gesi na mafuta, huku mkazo mdogo ukielekezwa katika kuzikabiri athari wanazozipata watu maskini”. Anasema Naibu Katibu Mkuu
Na kuongeza. “Tunahitaji kurekebisha mahesabu yetu na kuongeza ufanisi katika matumizi ya raslimali pamoja na  kuwa na mipango mizuri ya uchumi inayolenga na kuzingatia mahitaji ya watu maskini” anasisitiza Migiro.
Akahimiza na kuzitaka  nchi kuzingatia matumizi ya nishati ambazo ninazalisha kiasi kidogo cha hewa ukaa, upatikanaji wa nishati nafuu  ambayo zitahakikisha uwepo wa  mahusiano  mazuri na mazingira asilia.

0 Comments:

Post a Comment

Toa Maoni kistaarab kwa Hoja kwa faida ya wenzako. au tundikie kupitia nkoromo@gmail.com, simu 0672223269

ª