SAUDIA YASHAMBULIA RAIA NA MISIKITI NCHINI YEMEN

Saudi Arabia na washirika wake wamezidisha mashambulizi ya anga dhidi ya makazi ya raia na maeneo ya ibada nchini Yemen.

Ripoti zinasema kuwa, ndege za kivita za Saudi Arabia na washirika wake jana Alkhamisi zilifanya mashambulizi makubwa katika eneo la Sarwah kwenye mkoa wa Maarib na kuua raia wengi. Mashambulizi hayo pia yamesababisha hasara kubwa katika maeneo hayo. Ripoti zinasema kuwa baadhi ya mashambulizi hayo yameua watu wote wa familia moja katika eneo la al Qabitwa katika mkoa wa Lahaj.

Ndege za kivita za Saudia pia jana zilishambulia Msikiti wa al Wiraq katika eneo la Misrakh na kuua Waislamu kadhaa waliokuwa ndani ya msikiti huo.

Wakati huo huo Msemaji wa muungano unaopigana dhidi ya Saudia na washirika wake huko Yemen amekadhibisha madai kuwa kumefikiwa mapatano ya kusitisha vita baina ya wavamizi wa Kisaudia na harakati ya Ansarullah na kusema watawala wa kifalme wa Riyadh wangali wanashambulia maeneo mbalimbali ya Yemen na kumwaga damu za raia wasio na hatia.