KUONGEZEKA WIMBI LA MANUNG'UNIKO YA WANANCHI NCHINI MAREKANI

Taasisi ya uchunguzi wa maoni ya Gallup imetangaza ongezeko la wimbi la manung'uniko ya raia wa Marekani.

Kwa mujibu wa utafiti wa taasisi ya Gallup, asilimia 73 ya raia wa Marekani hawakubaliani na mwenendo wa matukio yanayojiri nchini mwao. Takwimu hizo zinaonyesha ongezeko la asilimia 10 la malalamiko hayo ikilinganishwa na mwezi uliopita. Aidha takwimu hizo zinatoa ujumbe kwamba, kati ya kila Wamarekani 10, ni Wamarekani watatu pekee ndio wanaoridhia mazingira ya ndani nchini humo.

Wamarekani wakiandamana

Kabla ya kufanyika uchaguzi wa rais hapo Novemba nane mwezi huu, kiwango cha ridhaa ya raia wa taifa hilo, kilifikia asilimia 37, kiwango ambacho ni kikubwa zaidi kuwahi kushuhudiwa katika kipindi cha miongo ya hivi karibuni. Hata hivyo, ushindi wa Donald Trump, mgombea wa chama cha Republican, umekifanya kiwango hicho kupungua sana. Isisahulike kuwa, manung'uniko ya raia nchini Marekani yanarejea nyuma hata kabla ya kutangazwa matokeo ya uchaguzi uliopita. Hali mbaya ya uchumi, hususan uhaba wa fursa mpya za ajira, ni miongoni mwa malalamiko ya raia wengi wa nchi hiyo. Kwa kuzingatia kuwa takwimu rasmi za ukosefu wa ajira zinaelezea kiwango cha karibu asilimia tano, hata hivyo uchunguzi huru unaelezea ongezeko la mara mbili zaidi ya hali hiyo.

Trump, rais mteule wa Marekani

Mbali na hayo, ugawaji usio wa kimantiki wa ajira nchini Marekani baina ya wanawake na wanaume, vijana na wazee na weupe na weusi ni miongoni mwa malalamiko ambayo yamekuwepo kwa muda sasa nchini humo. Katika fremu hiyo, kuibuka matatizo ya kifedha yanayokabili serikali ya Marekani, kumesababisha kuzorota pia huduma za kijamii kama vile ulipaji wa bima za kazi, kudhamini bima za afya za viwango vya chini, ugawaji wa ruzuku za chakula na misaada ya masomo, sanjari na kuzidisha mashinikizo kwa watu wa tabala la kati na masikini. Watu hao hivi sasa wanakabiliwa na mgogoro wa ukosefu wa ajira na kupanda kwa gharama za maisha, kama ambavyo pia wanatakiwa kubeba mzigo unaotokana na natija ya kufeli  mipango ya ustawi ya serikali.

Malalamiko ya Wamarekani

Mbali na matatizo ya kiuchumi na kimaisha, Wamarekani wanakabiliwa pia na migogoro ya kijamii. Katika kipindi cha miaka ya hivi karibuni, kiwango cha ustahamilivu wa tofauti za rangi kimezidi kushuka nchini Marekani. Kwa upande mmoja, weupe wana wasi wasi wa kuingia katika ushindani na watu wasio wazungu na wahajiri kwenye maisha ya kisiasa na kiuchumi dhidi yao, huku kwa upande wa pili ubaguzi dhidi ya wasio wazungu na wahajiri ukiwa umeshtadi zaidi nchini humo. Katika fremu hiyo, ufyatuaji risasi wa polisi dhidi ya vijana wenye asili ya Kiafrika, umeongeza malalamiko ya kupinga wimbi la ubaguzi nchini humo. Ukweli ni kwamba, suala hilo na lile la mgogoro wa kiuchumi, ni mambo ambayo kwa pamoja yanasambaratisha ndoto za Wamarekani. Katika hali hiyo, kushindwa mfumo wa kisiasa katika kutatua matatizo ya kijamii na kadhalika kufichuliwa kashfa za ufisadi za viongozi wa kisiasa, kumezidisha hasira ya wananchi dhidi ya serikali. Malalamiko ya wananchi yameongezeka kiasi cha kuwafanya wampigie kura mtu ambaye amekuwa akikosoa vikali mfumo wa jadi wa kibepari na muundo wa kisiasa na kiuchumi nchini humo.

Watawala wa zamani na wa sasa nchini Marekani

Kwa kutumia wimbi la malalmiko makali ya Wamarekani, Donald Trump, mgombea wa chama cha Republican, ameweza kuibuka mshindi katika uchaguzi uliopita kutokana na hali hiyo. Hata hivyo uchaguzi huo nao pia umeshadidisha tena wimbi la malalamiko ya wananchi ikilinganishwa na kipindi cha hapo nyuma. Hii ni kwa kuwa wengi wa Wamarekani wamekumbwa na hali ya wasi wasi juu ya ahadi alizozitoa Trump, ikiwa ni pamoja na kuwaondoa wahajiri haramu na kupiga marufuku Waislamu kuingia nchini hummo.