MAHABUSU WATOROKA CHINI YA ULINZI WA POLISI KIBAHA

Na Scolastica komba, Kibaha.
JESHI la Polisi mkoani Pwani linawasaka mahabusu wawili kati ya sita waliotoroka chini ya ulinzi wa

askari polisi wakati wakisafirishwa kwenda katika gereza la Mkuza wilayani Kibaha baada ya kuhudhuria

mahakamani kusikiliza kesi za unyang'anyi wa kutumia silaha na mauaji inayowakabili.  
   Kamanda wa Polisi mkoani Pwani Absaloom Mwakyoma alisema tukio hilo limetokea juzi majira ya saa 8

mchana wakati mahabusu sita walipokuwa wanasafirishwa kurudi gerezani hapo.
   Mwakyoma amesema mahabusu hao kwa pamoja walikuwa wakisafiri chini ya ulinzi wa askari Polisi G

1428 PC Sospeter, E 7943 PC Fredrick  na askari E 6126 PC Stephen kwa kutumia gari namba  PT 0823

Land Rover Defender ambapo walipofika eneo la Tamco jirani na msitu wa shirika la Elimu waliwashinda

nguvu askari hao wasindikizaji na kufanikiwa kuruka garini na kutokomea msituni.
   Mwakyoma amesema siku hiyo mahabusu hao wote sita walitoroka lakini muda mfupi baadae askari polisi

walifanya msako mkali uliokuwa ukiongozwa na Mkaguzi msaidizi wa Polisi Khatibu Sanduku na kufanikiwa

kuwakamata watuhumiwa wanne katika maeneo mbalimbali.
  Amewataja mahabusu hao sita waliotoroka kuwa ni Ramadhani Hamza,Mwinyimvua Juma,Simon

Maneno,Fabian Simon maarufu Mkwera,John Samweli maarufu kwa jina la Mapuri pamoja na Shaban

Mrisho maarufu kwa Jalala.
 Akielezea walivyokamatwa watuhumuwa hao wanne amesema katika eneo la tukio walifanikiwa

kukamatwa wawili ambao ni Mwinyimvua na Simon huku mtuhumiwa John akikamatwa eneo la Kwambonde

kilomita tano kutoka eneo la tukio na wa nne Ramadhani yeye alijisalimisha mwenyewe katika gereza la

Mkuza na kuletwa kituo cha Polisi Kibaha na askari Magereza
 Mwakyoma amesema juhudi za kuwatafuta watuhumiwa wawili Bw.Shabani na Bw.Fabian ambao

wanakabiliwa na kosa la unyanganyi wa kutumia silaha na mauaji zinaendelea kwa kutumia askari wa

kikosi cha intelijensia na vikundi vya ulinzi shirikishi na polisi jamii .
 Kamanda huyo amesema ili kuondoa mazingira yoyote ya utatanishi juu ya tukio hilo uchunguzi na hatua za

kinidhamu zitachukuliwa dhidi ya wote waliohusika na zoezi la usafirishaji wa mahabusu hao ikiwa ni

pamoja na Jeshi hilo limetangaza zawadi kwa yeyote atakayefanikisha kukamatwa kwa watuhumiwa hao

wawili  na pia Kamanada huyo aliwashauri watoro hao kujisalimisha wenyewe katika kituo chochote cha

polisi ili wajibu mashauri yao mbele ya vyombo vya sheria.