AU KUSHIRIKIANA NA SOMALIA KUDHAMINI USALAMA WAKATI WA UCHAGUZI

Umoja wa Afrika (AU) umeeleza kuwa utashirikiana na Somalia kudhamini usalama wakati wa kufanyika uchaguzi nchini humo.

Bi Lydia Wanyoto Naibu Mjumbe Maalumu wa Mwenyekiti wa Kamisheni ya Umoja wa Afrika katika Masuala ya Somalia amesema kuwa vikosi vya umoja huo (AMISOM) vitashirikiana na askari usalama wa Somalia kukabiliana na harakati za wanamgambo wa al Shabab wenye lengo la kuvuruga uchaguzi mkuu ujao nchini humo. 

Wanajeshi wa AMISOM 

Afisa huyo wa ngazi ya juu wa Umoja wa Afrika ameongeza kuwa tayari kumeanzishwa kikosi cha askari jeshi huko Somalia ambao watakuwa na jukumu la kudhamini usalama wakati kutakapofanyika uchaguzi yaani mwezi Septemba na Oktoba ujao nchini humo. Tume ya Uchaguzi ya Somalia imetangaza kuwa uchaguzi wa Rais wa nchi hiyo utafanyika tarehe 30 Oktoba na wa bunge umepangwa kufanyika kati ya tarehe 24 Septemba hadi tarehe 10 Oktoba. Wanamgambo wa al Shabab wamekuwa wakivuruga hali ya usalama huko Somalia kwa kutekeleza mashambulizi katika maeneo mbalimbali nchini humo na hata dhidi ya kikosi cha kulinda amani nchini humo (AMISOM).