.

HAKUNA ALIYE SALAMA-MIGIRO

Apr 17, 2011


Na  Mwandishi Maalum, New York
Majanga ya asili   pamoja na mageuzi ya kisiasa yanayoendelea katika  baadhi ya  mataifa  ni  sehemu  ya changamoto zinazoitaka  Jumuia ya Kimataifa  kuitafakari upya na  katika mapana yake dhana ya Usalama wa Binadamu.
Hayo yameelezwa na  Naibu Katibu Mkuu wa Umoja wa Mataifa , Asha-Rose  Migiro (pichani)  wakati Baraza Kuu la Umoja wa Mataifa lilipokutana kujadili na kubadilishana mawazo kuhusu  dhana  ya usalama wa binadamu.
Migiro anasema   majanga  ya asili kama vile tsunami na tetemeko la ardhi  yaliyotokea   nchini Japani, au mfululizo wa machafuko ya kisiasa yanayoendelea katika Mashariki ya kati, ni kielelezo tosha kwamba  Jumuia  ya Kimataifa inatakiwa kujipanga upya.
“Matukio    yanayoendelea hivi sasa  ni kielelezo dhahiri kwamba  hakuna nchi  iliyo salama  iwe imeendelea au inayoendelea, maskini au tajiri, wote hatuko salama. Anasisitiza Migiro
Na kuongeza. “ Na ndio sababu kwa kweli  tunahitaji kupanua  wigo wa dhana nzima ya usalama, wigo utakaohusisha pia mambo mengi  zaidi yanayotishia usalama , maisha  uhai na utu wa  kila mmoja wetu” anafafanua  Migiro.
Akabainisha kuwa  hatari kwa    usalama wa binadamu inaweza kuwa vya ghafla kama  vile majanga  ya aina ya   tsunami, lakini pia inaweza kuwa ni  ile inayotokana na  mrundikano wa mambo mengi na kwa muda mrefu kama yale ya utawala wa kimabavu.
Katika majadiliano hayo ambayo watoa mada kadhaa  akiwamo Rais Mstaafu wa Nigeria Olusegun Obasanjo, nchi  wanachama pamoja na wanazuoni  walibadilishana mawazo ya namna  bora na sahihi ya kuitafsiri dhana ya  usalama wa  binadamu.
Dhana hiyo ya usalama wa binadamu ilipitishwa mwaka 2005na wakuu wa nchi wanachama wa Umoja wa Mataifa, na kila mwaka kwa nyakati tofauti imekuwa ikijadiliwa kwa lengo la kupata muafaka wa tafsiri sahihi ya usalama wa binadamu.
Akichangia  mawazo yake kuhusu dhana hiyo, Rais mstaafu wa Nigeria Olusegun  Obasanjo,  yeye amesema kuwa ingawa  anakubaliana na misingi ya dhana ya usalama wa binadamu ambayo ni  uhuru wa mtu kuishi bila hofu, uhuru wa kutaka na uhuru wa  kuishi kwa heshima. Lakini anadhani suala kubwa na la msingi  wa yote hayo ni uhakika wa kuishi.
“ Uhakika wa mtu kuishi kwangu mimi   la msingi zaidi na linatakiwa liwe la kwanza halafu  ndiyo hayo matatu” anasema  Rais huyo Mstaafu ambaye alijitambulisha kama mkulima.
Obasanjo anasema kuwa kila mtu anaowajibu wa kwanza kuhusu maisha yake, na wajibu huo unaanzia katika ngazi ya familia, jumuia anayoishi na kupanda katika ngazi ya taifa na kuishia kimataifa.
“Wajibu wa kwanza wa kuhakikisha kuwa unaishi ni wako wewe kama mtu binafsi, lakini pia unawajibika katika jumuia unayoishi, serikali au taifa linatakiwa kuhakikisha kwamba unaishi kwa kukuwekea mazingira na misingi ya wewe kuishi lakini wajibu wa kwanza ni wako kama mtu binafsi”.
Rais huyo mstaafu anasema  uwajibikaji wa mtu mmoja mmoja katika familia au jumuia ni jambao ambalo halipashwi kupuuzwa au kuweka kando.
Aidha anasema kuwa  kutowajibika kwa wadau mbalimbali  zikiwamo serikali,  katika utekelezaji wa sera mbalimbali  kunaweza kuwa kichocheko au chimbuko la kutokuwapop kwa usalama wa binadamu.
Akatoa pendekezo kwamba kila nchi inatakiwa kuwa na  orodha ya mambo ambayo inadhani kama hayatatekelezwa  ipasavyo  yanaweza kupelekea kutokuwapo kwa usalama wa binadamu.
Anasema  kwa kuipitia orodha hiyo mara kwa mara  basi serikali inaweza kujua wapi inafanya vizuri wapi inalegalega na hivyo kuchukua hatua za tahadhari na kusisitiza kuwa hilo linawezekana.
Awali akimkaribisha Naibu Katibu  Mkuu kufungua majadiliano hayo, Rais wa Baraza Kuu la  Umoja wa Mataifa, Bw, Joseph Diess aliwaambisha washiriki wa majadiliano  hayo  kwamba,  tafsiri yoyote kuhusu dhana ya  usalama wa binadamu lazima izingatie misingi mitatu muhimu ambayo ni  usalama, maendeleo na haki za binadamu.

0 Comments:

Post a Comment

Toa Maoni kistaarab kwa Hoja kwa faida ya wenzako. au tundikie kupitia nkoromo@gmail.com, simu 0672223269

ª