SILAHA NDOGO NA NYEPESI BADO TISHIO KWA MAISHA YA BINADAMU-TANZANIA

Na Mwandishi  Maalum

New York

Jamhuri ya  Muungano wa Tanzania imesisitiza kuwa silaha ndogo ndogo na nyepesi  bado  ni  tishio  kwa maisha ya watu na mali zao katika nchi nyingi za Afrika zikiwamo za Maziwa Makuu.

Na kwa sababu hiyo, Tanzania imetaka  majadiliano kuhusu  upokonyaji na ukomeshaji wa matumizi ya silaha za maangamizi zikiwamo za nyukilia yalenge pia katika ukomeshaji na upokonyaji   silaha ndogo ndogo na nyepesi.

Msisitizo huo umetolewa na Mwakilishi wa Jamhuri ya Muungano wa Tanzania katika Umoja wa Mataifa, Balozi Ombeni Sefue , alipokuwa akichangia   mjadala kuhusu ukomeshaji, upokonyaji , ulimbikizaji  na matumizi ya  silaha za maangamizi .

Mjadala huo ambao unazihusisha nchi 193 wanachama wa UM , unafanyika nchini ya usimamizi wa Kamati ya kwanza ya Baraza Kuu la 66 la Umoja wa Mataifa. Kamati hiyo pamoja na mambo mengine ndiyo yenye dhamana ya masuala yote yanayohusiana na  udhibiti wa silaha.  

Balozi Ombeni Sefue, ameeleza kuwa, Tanzania inasisitiza matumizi haramu ya silaha ndogo ndogo na nyepesi kupewa uzito unaostahili katika majadiliano hayo, kutokana na ukweli kwamba  silaha hizo zimekuwa chanzo kikubwa cha machafuko,uvunjifu wa amani na  ongezeko la matukio ya uhalifu yakiwamo ya uharamia na biashara ya dawa za kulevya.

“Silaha  zote bila ya kujalisha ni za aina gani zinaathari kubwa kwa maisha ya watu na mali. Ni kwa sababu hiyo tunasisitiza kwamba majadiliano kuhusu upokonyaji wa silaha usibague aina ya silaha”.

Akasema kuwa Tanzania inasikitishwa na namna ambavyo silaha hizo zimendelea kuwa tishio na kusema .“Tunaishi katika dunia ya utandawazi, madhara ya   kuenea kwa silaha hizi ndogo ndogo  na nyepesi yanatugusa wote. Kwa  hiyo ni wajibu wetu kushirikiana kwa pamoja siyo tu katika kutafuta ufumbuzi wa   kudumu wa kupunguza silaha za maangamizi zikiwamo za nyukila bali pia  katika upunguzaji na upokonyaji wa silaha ndogo ndogo na nyepesi” akasisitiza Balozi Sefue

Na kuogeza.  “ Ubaguzi wa aina yoyote kati ya makundi  haya mawili ya silaha ni sawa na kuwabagua binadamu”.

Akizungumzia mchango wa  Jamhuri ya Muungano wa Tanzania katika upunguzaji wa matumzi ya silaha za maangamzi zikiwamo silaha ndogo na nyepesi.

Balozi Sefue anasema,  ingawa Tanzania haina silaha za nyukilia au za maangamizi,  imekwisha ridhia  mikataba mbalimali ya kimataifa na kikanda inayolenga katika kulitafutia ufumbuzi tatizo la matumizi ya silaha hizo pamoja na kulifanya bara la Afrika kuwa bara huru dhidi ya silaha za nyukilia.

Aidha akasema, Tanzania haiungi mkono nchi yoyote ile kujilimbikizia silaha za maangamizi zikiwamo za nyukilia.Na kwamba Tanzania inaamini kuwa dunia inaweza kuwa mahali pa amani na salama zaidi pasipo  kuwa na silaha hizo.

Akatumia fursa hiyo kuzipongeza Marekani na Urusi kwa kuingia  makubaliano ya upunguzaji na   ulimbikizaji wa silaha za nyukilia na akazishauri nchi nyingine kuiga mfano  wa nchi hizo mbili.

Katika hatua nyingine Tanzania  imebainisha kuwa ugaidi  unaendeleo kuwa changamoto kwa  usalama na amani ya kimataifa,

Akizungumza wakati wa majadiliano kuhusu juhudi za kukabiliana na  ugaidi, Balozi wa Tanzania katika UM.Ombeni Sefue amesema kuendelea kujirudia kwa matukio ya ugaidi kunaonyesha dhahiri kwamba hakuna nchi ambayo iko salama.

Akasema cha kutisha zaidi ni hali ya ugaidi huo kutobagua hata vyombo vinavyosimamia na kutetea haki za binadamu, usalama na ustawi wa jamii kama Umoja wa Mataifa.

Akatoa mfano  wa hivi karibu ambapo tukio la  kigaidi lilihusisha majengo ya Umoja wa Mataifa huko Abuja, nchini Nigeria tukio liliposababisha pia  upotevu wa maisha ya watu wasio  na hatia.

Aidha Balozi Sefue amesema Tanzania inasikitishwa na mkwamo wa maandalizi ya rasimu ya mkataba kuhusu ugaidi kutoka na tofauti za kimitizamo zikiwamo za tafsiri sahihi na inayokubalika kuhusu neno ugaidi.

Tanzania kupitia mwakilishi wake, imezitaka nchi zote kuonyesha utashi wa kisiasa ili kusukuma mbele mchakato wa maandalizi ya  Mkataba huo.

“Kwa pamoja tunaweza kama tukitaka kuratibu na kushirikiana kwa karibu kuzitafutia ufumbuzi ajenda zinazotukwamisha kukamilisha rasmu  ya  Mkataba kuhusu Ugaidi”.akasema  Balozi  Sefue.

mwisho