ACACIA BULYANHULU YANUSURU MRADI WA VIJANA SHINYANGA

Sara Ezra Tri, (kushoto), ambaye ni mkuu wa mahusiano ya jamii wa mgodi wa ACACIA-Bulyanhulu, akikabidhi trekta ndogo ya kulimia na kubebea mizigo (Power tiller), kwa katibu wa Ushirika vijana wa Bulyanhulu Youth Development Multipurpose Cooperative Society (BYDEMCOS), Erasto Mapati wakati wa haflafupi iliyofanyika mgodini hapo.

NA MWANDISHI MAALUM, KAHAMA

Misaada yenye thamani ya mamilioni imeendelea kumiminwa na Mgodi wa dhahabu wa Acacia Bulyanhulu kwa kikundi cha vijana zaidi ya mia mbili wanaounda ushirika wa shughuli mbalimbali za uzalishaji mali katika mkoa wa Shinyanga. Ushirika huo wa Bulyanhulu Youth Development Multipurpose Cooperative Society (BYDEMCOS) wenye makao yake makuu katika mji mdogo wa Kakola uliopo karibu na mgodi wa dhahabu wa Bulyanhulu katika wilaya ya Msalala umeanzishwa na vijana hao kwa ajili ya kutoa ajira mbadala kwa makundi ya vijana wanaoishi karibu na Mgodi wa Bulyanhulu.

Akikabidhi msaada wa kwanza kwa mwaka huu kwa kikundi hicho wa Powertiller yenye thamani ya shilingi milioni saba na nusu, kiongozi wa Mahusiano ya Jamii katika mgodi wa dhahabu wa Bulyanhulu Bi. Sara Ezra Teri amewataka vijana hao kuhakikisha wanatumia powetiller hiyo kuanza kuendeshea miradi walisaidiwa na Mgodi huo kuleta faida.

“Leo tunawakabidhi msaada mwingine wa powetiller ambayo ina uwezo wa kufanya kazi mbalimbali, mwaka jana tuliwakabidhi vifaa vya kuanzishia mradi wa usafi vyenye thamani ya shilingi milioni 11 na mkasema kukosekana kwa usafiri kunakwamisha mradi huo, hivyo tumeamua kuwapatia powetiller hii yenye uwezo wa kutumika kwa shughuli zenu mbalimbali kama vile kusafirishia taka katika mradi wenu wa usafi wa mazingira katika miji wilayani humu.”

Akipokea kitendea kazi hicho katibu wa kikundi hicho Erasto Mapato alisema “ Kwa kweli sisi kikundi chetu hakina la kujitetea kwani Mgodi unatusaidia kwa hali na mali kuukuza ushirika wetu, powertiller hii mliotupatia ina majembe yake ya kulimia na hivyo kwa kutumia vijana wataalamu wa kitendea kazi hiki miradi yetu ya usafi na kilimo pia itaenda vizuri.”

Meneja wa Ufanisi wa Mgodi wa Bulyanhulu Bw. Elias Kasitila amesema vijana hao hadi sasa wameshapatiwa vitendea kazi mbalimbali na mgodi wa dhahabu wa Acacia Bulyanhulu vyenye thamani ya shilingi mioni 40 kwa ajili ya kuanzishia miradi ya ajira mbadala, ametaja misaada hiyo kuwa ni pamoja na machine 16 za kufyatulia matofali mfungamano na mafunzo ya ufyatuaji na ujenzi wa matofali hayo, Camera ya picha cha za mnato, vifaa vya kuendeshea ofisi yao, vifaa vya kufanyia biashara ya mazao ya chakula.

Kadharika vijana hao wamepatiwa uzabuni wa ujenzi katika mradi wa ujenzi wa maabara Mkoani Geita unaodhaminiwa na Mgodi wa Dhahabu wa Bulyanhulu. Katika Mradi huo Mgodi wa Bulyanhulu unawajengea wanafunzi wa Shule ya Sekondari maabara ya kisasa ya Sayansi katika Shule ya sekondari ya Njijundu wilayani Nyangwa’le ikiwa ni sehemu ya uwajibikaji wa Kampuni katika kusaidia jamii zilizo jirani na mgodi.

Aidha Kasitila amesema halikadharika kikundi hicho cha vijana kimepatiwa zabuni ya kukusanya vyuma chakavu na vilivyoisha matumizi katika Mgodi wa dhahabu wa Bulyanhulu, “Katika zabuni hii vijana watajipatia chanzo mbadala cha mapato na ajira kwani Mgodi unazalisha vyuma chakavu vingi ambavyo vinaweza kuchakatwa na kutumika kwa matumizi mengine.”