MENEJA WA KITUO CHA MABASI UBUNGO ATUMBULIWA

MARTHA MAGAWA

Wakati Serikali kupitia Wizara ya Afya na Ustawi wa Jamii ikijitahidi kupiga vita Ugonjwa wa Kipindupindu nchini kwa kuhimiza kuweka mazingira safi majumbani na sehemu zenye mikusanyiko ya watu, lakini katika kituo cha Mabasi Ubungo mambo si shwari baada ya mazingira yake kubainika yanahatarisha afya za watumiajiwa kituo hicho.

Hayo yamebainika mara baada ya Mstahiki Meya wa Jiji la Dar es Salaam Isaya Mwita  kutembelea Kituo hicho na kubaini madudu hayo na kuamua kumsimamisha kazi aliyekuwa Meneja wa Kituo hicho Juma Iddy kutokana na kuwasilisha taarifa ya tofauti na alichokishuhudia, pamoja na mkandarasi aliyepewa kazi ya kuzoa taka na kusimamia usafi kushindwa kutekeleza majukumu yake aliyopangiwa.

Katika hatua nyingine amesema kuwa jiji halitambui kuuzwa kwa Shirika la Usafiri Dar es Salaam (UDA) hivyo ameeleza kuwa mradi huo unapaswa urudishwe katika Mamlaka ya Jiji wausimamie na hakutakuwa na mgawanyo wa mapato ya asilimia 52% kati yao na Mradi wa Mabasi yaendayo Haraka (DART) kwa kile alichodai kuwa mkataba haukuwa halali.