MAREKANI YASHINIKIZA KUFUNGWA AKAUNTI 3, 000 ZAIDI ZA 'HIZBULLAH'

Zaidi ya akaunti 3,000 za benki za watu wanaoaminika kuwa na mafungamano na harakati ya Hizbullah ya Lebanon zinatazamiwa kufungwa karibuni hivi, kufuatia mashinikizo ya Marekani.

Gazeti la Asharq Al-Awsat linalochapishwa kila siku nchini Saudia limeripoti kuwa, watakaoathirika na kufungwa akaunti zao za benki ni pamoja na wafanyakazi, washirika na wateja wanaohusishwa na Hizbullah.

Kufuatia mashinikizo ya Marekani, Riadh Salameh, Gavana wa Benki Kuu ya Lebanon tayari ameagiza kufungwa akaunti 100 za watu wanaodaiwa kuwa na uhusiano na Hizbullah. Hii ni katika hali ambayo, Mkuu wa harakati ya al-Marada ya Lebanon amesema kuwa, vikwazo vya kifedha vilivyowekwa na Marekani dhidi ya Hizbullah haviwezi kuidhoofisha harakati hiyo ya muqawama wa Kiislamu. Amesisitiza kuwa, njama za Washington kuzishinikiza benki na serikali ya Lebanon ili zikubali kushirinikiana nayo katika vikwazo hivyo hazitosaidia kitu. Ameashiria kuwa, uzoefu unaonesha kwamba vikwazo huwa na matokeo tofauti na yanayotarajiwa na maadui na kwamba vikwazo vya hivi sasa vya Marekani dhidi ya Hizbullah vitazidisha tu ushawishi na nguvu za harakati hiyo na kuifanya kuwa na misimamo imara zaidi. Baada ya kupasisha vikwazo vya kifedha dhidi ya Hizbullah kwa ajili ya kudhamini manufaa ya utawala wa Kizayuni wa Israel na Saudia, serikali ya Marekani ilimtuma Waziri wake wa Hazina mjini Beirut ili kuishinikiza serikali ya Lebanon ikubali kushirikiana nayo katika vikwazo dhidi ya Hizbullah.