ASKARI MWANDAMIZI WA MAREKANI AKAMATWA KWA KUJARIBU KUUA WAISLAMU

Ofisa mwandamizi wa jeshi la Marekani anatazamiwa kupandishwa kizimbani karibuni hivi kwa madai ya kutishia kushambulia msikiti na kuua waumini wa Kiislamu katika jimbo la Carolina Kaskazini.

Taarifa ya Polisi ya Kaunti ya Hoke imesema kuwa, Meja Russell Thomas Langford, kamanda mwandamizi wa jeshi la Marekani anakabiliwa na mashitaka ya kutishia kufanya mauaji, udini, kutishia umati mkubwa kwa silaha, kutoa matamshi ya kibaguzi na kuvizia. Habari zinasema kuwa, Alkhamisi iliyopita Meja Langford alitishia kuwaua kwa bastola na kuwagonga kwa gari lake, waumini wa Kiislamu waliokuwa wakielekea katika msikiti wa Al-Madina, katika mji wa Raeford, Kaunti ya Hoke, jimbo la Carolina Kaskazini, kutekeleza ibada ya Swala nyakati za jioni wakati huu wa mwezi mtukufu wa Ramadhani. Imearifiwa kuwa, mbali na kuwatishia kwa bunduki na kuwatolea maneno makali ya kibaguzi, ofisa huyo mwandamizi wa jeshi la Marekani alimwaga kwa makusudi na kejeli, nyama za nguruwe katika lango la kuingia msikiti huo. Ibrahim Hooper, msemaji wa Baraza la Mahusiano la Waislamu nchini Marekani amekosoa kitendo hicho na kulitaka jeshi la polisi nchini humo kuwadhaminia usalama waumini wa Kiislamu wanapotekeleza ibada zao na haswa ibada za usiku katika mwezi huu wa Ramadhani.

Sanjari na kushika kasi kampeni za uchaguzi wa rais nchini Marekani, suala la chuki na ubaguzi dhidi ya Uislamu na Waislamu limeongezeka mara dufu, huku baadhi ya wanasiasa kama vile mgombea wa kiti cha rais wa chama cha Republican, Donald Trump wakitoa wazi wazi maneno makali ya kuudhi dhidi ya wafuasi wa dini hiyo tukufu.