SERIKALI YA BURUNDI YAPINGA MPANGO WA MAZUNGUMZO NA WAPINZANI WA KISIASA

Licha ya juhudi za upatanishi kwa ajili ya kutatua mgogoro wa Burundi, serikali ya nchi hiyo imekataa pendekezo la kufanya mazungumzo na wapinzani wake wa kisiasa.

Katika hali ambayo mazungumzo ya kujaribu kutatua tofauti zilizopo baina ya serikali na vyama vya upinzani nchini yanatakiwa kumalizika kufikia mwishoni mwa mwezi Juni mwaka huu, serikali ya Bujumbura imeweka wazi kuwa, kamwe haiwezi kuketi kwenye meza moja ya mazungumzo na wanaharakati wa kisiasa wanaosababisha mchafuko na hali ya mivutano nchini humo.

Msemaji wa serikali ya Burundi, Philippe Nzobonariba amesema kuwa, ni suala lisilowezekana kufanya mazungumzo na wapinzani wenye misimamo mikali na makundi yenye silaha ili kufikia maelewano ya kitaifa. Nzobonariba amesisitiza pia kuwa mazungumzo kati ya serikali na wapinzani yatafanyika kwa kuwashirikisha tu shakhsia wanaounga mkono mapatano ya kitaifa na mazungumzo ya amani. Baadhi ya vyama vya kisiasa nchini Burundi kati ya tarehe 21 na tarehe 24 mwezi Mei mwaka huu, vilishiriki katika mazungumzo shirikishi ya mjini ArushaTanzania hata hivyo baadhi ya wapinzani walisusia mazungumzo hayo. Mazungumzo ya amani nchini Burundi chini ya upatanishi wa Rais Yoweri Museven wa Uganda, yalimalizika mwaka jana bila kufikia natija yoyote. Rais mstaafu wa Tanzania Benjamin William Mkapa hivi sasa ndiye mpatanishi katika mazungumzo ya kusaka amani Burundi kati ya serikali na wapinzani.

Mgogoro wa Burundi ulianza tarehe 25 April mwaka jana, wakati Rais Pierre Nkurunziza wa nchi hiyo alipotangaza azma yake ya kugombea kiti cha urais kwa tiketi ya chama tawala katika uchaguzi wa mwezi Julai mwaka jana. Maandamano ya wananchi, mapinduzi ya kijeshi yaliyofeli na kuuawa watu karibu 500 ni mambo ambayo yamejiri huko Burundi katika kipindi cha mwaka mmoja wa hivi karibuni kufuatia hatua ya rais huyo ya kurefusha muda wake wa kusalia madarakani. Tarehe tatu ya mwezi huu, Benjamin Mkapa ambaye alichaguliwa na Jumuiya ya nchi za Afrika Mashariki EAC kuwa mpatanishi wa mgogoro wa Burundi, alitangaza kuwa tarehe 15 ya mwezi huu atakutana na muungano mkuu wa vyama vya upinzani dhidi ya serikali kwa ajili ya mazungumzo. Ahadi ya msuluhishi huyo, ilienda sambamba na kutolewa na serikali muhula wa kuhitimisha harakati za upinzani kwa kundi la wapinzani la eneo la Mugamba. Hii ni kusema kuwa, Rais Pierre Nkurunziza alitoa muhula wa siku 15 kwa waasi wa eneo hilo kuhakikisha wanaachana na harakati zao za uasi na kurejea mjini Bujumbura haraka iwezekanavyo. Duru za usalama nchini humo zinazitaja harakati za kundi hilo jipya kuwa ziilizo na lengo la kupinga hatua ya kuendelea kusalia madarakani Rais Nkurunziza. Kwa mujibu wa duru hizo za usalama, wafuasi wa kundi hilo ndio waliohusika na mashambulizi kadhaa ya hivi karibuni katika viunga vya jiji la Bujumbura. Wakati huohuo baadhi ya weledi wa mambo wamelihusisha kundi la vijana wa chama tawala Imbonerakure na mauaji dhidi ya wapinzani ndani ya taifa hilo. Kwa hakika kuendelea kusalia madarakani Rais Pierre Nkurunziza kumeibua mgogoro mkubwa nchini Burundi, mgogoro ambao baadhi ya weledi wa mambo wameutabiri kuwa huenda ukadumu hadi mwaka 2022. Kuendelea kung'ang'ania madaraka ni jambo ambalo vyama vya upinzani na waungaji mkono wa demokrasia wameliona kuwa kinyume cha sheria na kwa ajili hiyo wamemtaka Rais Nkurunziza kuondoka madarakani. Jariobio la mapinduzi ya kijeshi lililoongozwa na Godefroid Niyombare hapo tarehe 13 mwezi Mei mwaka jana, linaonekana kuwa lililoutikisa utawala wa Rais Nkurunziza nchini humo. Pamoja na yote hayo viongozi wa Umoja wa Afrika na Jumuiya ya Nchi za Afrika Mashariki walilaani jaribio hilo la mapinduzi na kusisitizia kuwa, hatua yoyote ya kuingia madarakani inatakiwa kujiri kupitia makubaliano ya mjini Arusha, kaskazini mwa Tanzania na kwa mujibu wa katiba ya taifa la Burundi. Kwa mujibu wa weledi wa mambo, serikali ya Bujumbura bado inaendelea kusisitiza kukataa pendekezo la taasisi hizo zilizoitaka serikali hiyo kufanya mazungumzo na wapinzani.