TAJIRI WA TP-MAZEMBE, MOISE KATUMBI AHUKUMIWA KIFUNGO CHA MIAKA MITATU JELA, MWENYEWE HAKUWEPO MAHAKAMANI

NA K-VIS MEDIA NA MASHIRIKA YA HABARI

Mgombea kiti cha Rais wa Jamhuri ya Kidemokrasia ya Congo (DRC), kutoka upinzani, Moise Katumbi, (pichani) amehukumiwa kifungo cha miaka mitatu jela  Juni 22, 2016 kwa kosa la kumiliki nyumba isivyo halali, Mwanasheria wake amesema.

Sambamba na kifungo hicho, Katumbi ambaye ni tajiri mkubwa huko DRC akimiliki klabu maarufu ya soka ya TP-Mazembe, atatakiwa kulipa faini ya Dola za Kimarekani Milioni 1.

Hata hivyo Katumbi, amehukumiwa huku akiwa ng’ambo akipatiwa matibabu.

Katumbi amekanusha mashtaka hayo pamoja nay ale ya kuajiri mamluki kwa nia ya kuuyumbisha utawala kuwa yana msukumo wa kisiasa na yanalenga kumzuia kuwania nafasi hiyo ya urais.

Wakili wake Barthelemy Mumba Gama ameliambia shirika la habari la Uingereza, Reuters kuwa hukumu hiyo ni ukiukwaji mkubwa wa sheria kwani amehukumiwa huku akiwa nje kwa matibabu tena kwa ruhusa ya mwendesha mashtaka mkuu wa serikali.

Katumbi, ambaye yuko Ulaya kwa matibabu, ndiye mgombea maarufu zaidi anayetarajiwa kuleta upinzani mkubwa kwa Rais wa sasa, Joseph Kabila katika uchaguzi unaotarajiwa kufanyika Novemba mwaka huu 2016.

Rais Joseph Kabila