MATAMSHI YA KIONGOZI MUADHAMU WA MAPINDUZI KATIKA MAZUNGUMZO NA RAIS WA GHANA

Akizungumza na Rais John Dramani Mahama wa Ghana hapo jana Jumapili hapa mjini Tehran, Ayatullah Khamenei, Kiongozi Muadhamu wa Mapinduzi ya Kiislamu amesema kuwa maslahi ya madola ya kiistikbari duniani ndicho chanzo cha ghasia na vita vinavyoendelea katika pembe mbalimbali za dunia.

Huku akiashiria kuongezeka kusiko kwa kawaida kwa makundi ya kigaidi Mashariki ya Kati na vilevile barani Afrika, Kiongozi Muadhamu wa Mapinduzi ya Kiislamu amehoji ni vipi kiwango kikubwa cha silaha za kisasa na fedha zinayafikia makundi hayo. Akibainisha chanzo cha suala hilo, Kiongozi Muadhamu amesema kuwa makundi hayo ya kigaidi yamebuniwa na kudhaminiwa na mashirika ya kijasusi, na kwamba kiini cha matatizo yaliyopo ni madola makubwa ya kiistikbari yanayoongozwa na Marekani, na pia utawala wa Kizayuni wa Israel ambao unatumia fursa hiyo kuwa dhihirisho la shari katika eneo. Ukweli wa mambo ni kuwa nchi nyingi duniani zinakabiliwa na tishio la pamoja ambalo ni ugaidi. Suala hilo linaonyesha wazi kuwa ugaidi hutambui mipaka na kwamba umeeneza mizizi katika nchi za Asia, Afrika Ulaya na hata katika jamii ya Marekani. Ugaidi na misimamo ya kupindukia mipaka unachochewa na mambo kadhaa, muhimu zaidi zikiwa ni siasa za kindumakuwili za nchi za Magharibi katika suala zima la kupambana na ugaidi na kutumiwa makundi ya kigaidi kama Daesh kuwa chombo cha kufikia malengo yao haramu. Kama ilivyoashiriwa katika matamshi ya Kiongozi Muadhamu wa Mapinduzi ya Kiislamu alipomkaribisha ofisini kwake Rais Dramani Mahama wa Ghana, njia pekee ya kupambana na ugaidi ni kukabiliana na kila jambo lilanochochea ugaidi pamoja na kung'oa mizizi yake yote. Ili kufikia lengo hilo uwanja unaofaa unapasa kuandaliwa ili kuruhusu pande zote husika kushirikiana katika kupambana na tishio hilo la pamoja . Mtazamo wa Iran katika ushirikiano wake na nchi tofauti za dunia umejengeka katika msingi huo. Uhusiano wa Iran na nchi za Kiafrika ikiwemo Ghana pia unatekelezwa kwa mtazamo huo. Masuala yaliyojadiliwa katika mazungumzo ya Rais wa Ghana na viongozi wa Jamhuri ya Kiislamu ya Iran yanathibitisha kiwango cha uhusiano huo. Jamhuri ya Kiislamu ya Iran inaamini kuwa kama hakutakuwepo na ushirikiano wa aina hiyo basi nchi zote zitadhurika kutokana na ugaidi na wala hakuna yeyote atakayeshinda katika uwanja huo. Kwa hakika usalama ni suala la kimataifa na wala halihusiani tu na mipaka ya nchi za Asia na Afrika. Kwa hivyo njia pekee ya kupambana na ugaidi ni kushirikiana nchi zote za dunia. Ghana pia ambayo ina uzoefu mkubwa katika mapambano dhidi ya ukoloni imeazimia kukabiliana vilivyo na makundi ya kigaidi. Pamoja na hayo tunapasa kusema kuwa ili kukabiliana vilivyo na vitisho na changamoto za pamoja kuna haja ya kubadilishwa mitazamo hasi na kufutiliwa mbali siasa za kundumakuwili za baadhi ya nchi zinazodai kuambana na ugaidi.

Ukweli wa mambo ni kuwa baadhi ya nchi za eneo ikiwemo Saudi Arabia zinachochea ugaidi na kuutumia katika kujaribu kuiangusha serikali halali ya Syria. Bila shaka siasa hizo mbovu zitaimarisha tu malengo ya uingiliaji na kujipanua Marekani na wakati huohuo kuupa utawala haramu wa Israel fursa ya kutumia vibaya migogoro ya eneo kwa ajili ya kudhamini maslahi yake.