DKT SHEIN ASHIRIKI KATIKA MAADHIMISHO YA SIKU YA SHERIA ZANZIBA

by SOLO Mazalla

Na Miza Kona Maelezo-Zanzibar

Rais wa Zanzibar ambae pia ni Mwenyekiti wa Baraza la Mapinduzi Dkt Ali Mohamed Shein amesema uhuru wa mahkama ni suala la msingi na lenye umuhimu mkubwa katika kujenga utawala bora nchini.

Hayo ameyasema huko Victoria Garden Wilaya ya Mjini Unguja katika maadhimisho ya Siku ya Sheria Zanzibar, Dkt Shein amesema ili Mahkama iendelee kuwa huru mihili mengine haipaswi kuingilia katika maamuzi yake kama ilivyo hapa nchini hivyo ni muhimu kwa majaji, wanasheria, mahakimu, mawakili na wahusika wa kada ya sheria kutekeleza majukumu yao bila ya hofu na upendeleo kwa kuzingatia katiba na sheria ziliopo.

Rais Shein amesema uhuru huo utakuwepo pindi patakapokuwa na taasisi zilizo huru zilizowekwa kikatiba na kisheria zenye kufanya kazi zake kwa uadilifu na mashirikiano.

Amewataka wananchi kufanya jitida ya kuzielewa sheria mbali mbali zilizopo ambazo ni muhimu katika kusimamia maisha ya kila siku kwani Mahkama ina dhamana ya kutekeleza majukumu yake bila ya kuingiliwa kutokana na uhuru uliopewa kwa kuzingatia sheria.

“Mahkama inatakiwa kuwa chombo au taasisi huru, uhuru kwa maana ya kuwa huru wale wote waliopewa jukumu na katiba la kutoa haki ya kuamua mtu kuwa mkosa au hana hatia lazima awe huru kutokana na shindikizo bila ya kujali anakotoka, Mahkama iwe huru kutokana shindikizo la Kisiasa, Kiutawala na Kihisia ikiwa inataka kufanya kazi zake kwa uadilifu unaofuata sheria mama ambayo ni Katiba pia Mhkama haitakiwi kulazimishwa au kupokea vitisho vya aina yoyote” , amefahamisha Dkt Shein.

Akizungumzia kuhusu suala la Rushwa nchini Dkt Shein amesema kuwa tafiti mbali mbali zilizofanywa nchini na mashirika ya Kimataifa kuhusu tatizo la Rushwa na Uhujumu wa Uchumi zinaonyesha kuwa mambo hayo ndio yanayokwamishwa maendeleo ya nchi zinazoendelea hivyo amewataka wananchi kuongeza kasi ya mapambano katika kuchukia Rushwa na kuwa mstari wa mbele katika kulinda mali na maslahi ya Umma.

Nae Waziri wa Katiba na Sheria Mhe. Abubakar Khamis Bakari amesema ucheleweshaji wa kesi Mahkamani unasababisha mashahidi na wazee kuwa wagumu katika kutoa mashirikiano hata hivyo chombo husika kinaendela kufanya mbinu za kulitatua tatizo hilo.

Mapema Jaji Mkuu wa Zanzibar Omar Othaman Makungu amesema uhru wa Mahkama ni kutoa haki bila ya upendeleo, woga wala kupokea rushwa na kufuata misingi ya sheria katika utoaji wa haki.

Ametanabahisha kuwa dhana ya kufuata sheria ndio kigezo muhimu katika utawala bora kwani hupelekea kuwepo kwa uwazi na uwajibikaji kwa watumishi wa umma hivyo amewataka watumishi hao kufuata sheria kikamilifu katika kuwahudumia wananchi ili waweze kupata haki zao bila usumbufu wa aina yoyote.

Amesema kuwa wasimamizi wa sheria watoe haki bila ya upendeleo na kuitumia sheria bila ya kuogopa na kumhofia mtu yeyote kwani ndiko kutakowafanya watu kuridhishwa na maamuzi yanayotolewa na Mahakama na kuepusha vurugu jambo litakalopelekea nchi kuwa yenye amani na usalama.