MAKABILIANO YA POLISI YA MISRI NA WAPINZANI WA SIASA ZA SERIKALI

Polisi ya Misri amekabiliana vikali na wapinzani wa siasa za serikali ya Rais Abdulfattah as-Sisi wa nchi hiyo huku ikiwarushia gesi ya kutoa machozi.

Mamia ya Wamisri jana Jumatatu walifanya maandamano makubwa mjini Cairo mji mkuu wa nchi hiyo wakimtaka as-Sisi aondoke madarakani. Waandamanaji hao wanapinga kukabidhiwa Saudi Arabia visiwa viwili vya Misri vya Sanafir na Tiran. Kufia sasa polisi ya nchi hiyo imewakamata watu wapatao 23 katika miji tofauti ya nchi hiyo. Kabla ya kufanyika maandamano hayo, maelfu ya askari kutoka kikosi cha polisi na jeshi la nchi hiyo walikuwa wamewekwa katika sehemu nyeti na muhimu za mji mkuu huo, na hasa katika medani ya at-Tahrir ambacho ni kituo muhimu cha kuanza mwamko na mapinduzi ya wananchi ya mwaka 2011. Maandamano ya jana ni ya pili kufanyika katika mwezi huu wa Aprili katika kulalamikia kupewa Saudia visiwa viwili vilivyotajwa na serikali ya as-Sisi. Visiwa hivyo muhimu vya Sanafir na Tiran viko kwenye lango la Ghuba ya Aqabah. Wakati huohuo utawala haramu wa Israel na Jordan zina bandari muhimu katika ghuba hiyo. Kuna nadharia kadhaa zinazotolewa kuhusiana na sababu za kukabidhiwa Saudi Arabia visiwa hivyo. Tokea kuingia madarakani Rais as-Sisi hapo mwaka 2013, watawala wa Saudia wamekuwa wakiipa serikali ya as-Sisi misaada mingi ya kifedha na kisiasa. Jenerali as-Sisi alinyakua madaraka ya Misri baada ya kuing'oa madarakani serikali halali ya Muhammad Mursi kupitia mapinduzi ya kijeshi.

Katika safari rasmi ya Mfalme Salman wa Saudia nchini Misri ambayo ilianza tarehe 11 Aprili visiwa viwili vya Sanafir na Tiran vilikabidhiwa kwa utawala wa Saudia. Hamdeen Sabahi mpinzani wa pekee wa as-Sisi katia uchaguzi uliopita ndiye aliyefichua habari ya kukabidhiwa visiwa hivyo vya Misri kwa Saudia. Alisema ukabidhi huo unakwenda kinyume na katiba ya Misri ambayo inapiga marufuku kukabidhiwa kwa ardhi ya nchi hiyo kwa nchi nyingine. Inasemekana kwamba Misri ilikabidhi visiwa hivyo kwa lengo la kupewa dola bilioni 20 na Saudia. Pamoja na hali hiyo serikali ya Misri inadai kwamba askari wa Misri walitumwa kwa muda kwenye visiwa hivyo kwa lengo la kwenda kulinda usalama kutokana na ombi lililotolewa kwa serikali ya Misri mwaka 1950 na mfalme wa wakati huo wa Saudi Arabia, Abdul Aziz.

Hata hivyo wapinzani wa serikali ya Cairo wanasisitiza kwamba kwa mujibu wa mkataba wa 1906 uliotiwa saini kati ya mfalme wa Othmania na serikali ya Uingereza mipaka ya baharini kati ya Misri na Saudi Arabia iliainishwa na ufalme wa Othmania, ambapo visiwa viwili vya Sabafir na Tiran viliwekwa ndani ya mipaka ya Misri. Kuhusu suala hilo Khalid Ali, mwanasheria na mwanaharakati wa haki za binadamu anakusudia kuwasilisha mahakamani faili la kalalamikia kukabidhiwa visiwa hivyo kwa Saudia. Wataalamu wa mambo wanasema kwamba kwa kuzingatia kuongezeka upinzani dhidi ya serikali ya Abdulfattah as-Sisi, wanasheria na wanaharakati wengine wa kisiasa watashirikiana na Khalid Ali katika kufuatilia suala la kukabidhiwa visiwa viwili vilivyotajwa kwa utawala wa Saudi Arabia.