BOKO HARAM : TUPO TAYARI KUWAACHIA HURU WANAFUNZI WENGINE 83

Kundi la kigaidi na kitakfiri la Boko Haram la Nigeria limeeleza juu ya utayarifu wake wa kuwaachia huru makumi ya wanafunzi wa kike waliowateka nyara zaidi ya miaka miwili iliyopita.

Garba Shehu, msemaji wa Rais wa Nigeria amesema kundi hilo la kigaidi limetangaza kuwa tayari kuwaachia huru wanafunzi wengine 83 iwapo serikali itakubali kuketi kwenye meza ya mazungumzo na wanamgambo hao wa kitakfiri. Aidha msemaji wa Rais wa Nigeria amesisitiza kuwa serikali iko tayari kufanya mazungumzo na kundi hilo la kigaidi kuhusiana na kuachiwa huru wanafunzi hao wa kike.

Gaidi wa Boko Haram na wanafunzi wa Shule ya Upili ya Chibok

Alkhamisi iliyopita, wanafunzi 21 wa Shule ya Upili ya Chibok waliachiwa huru katika eneo la Banki, kwenye mpaka wa Nigeria na Cameroon, katika kile kilichotajwa kuwa makubaliano maalumu baina ya serikali ya Abuja na kundi la Boko Haram. Garba Shehu, msemaji wa Rais wa Nigeria alithibitisha habari hiyo na kusema kuwa, Shirika la Msalaba Mwekundu na serikali ya Uswisi ndizo zilizofanikisha kuchiliwa huru wasichana hao. 

Juhudi mbalimbali yakiwemo maandamano ya kimataifa ya amani zimekuwa zikifanyika kwa ajili ya kushinikiza kuachiwa huru wasichana wote waliotekwa nyara na kundi la Boko Haram.

Ikumbukwe kuwa, tarehe 14 Aprili 2014, kundi hilo la kigaidi liliwateka nyara wanafunzi 276 wa kike katika eneo la Chibok, wakati wasichana hao walipokuwa wanafanya mtihani. Wasichana 57 walifanikiwa kutoroka mara baada ya kutekwa nyara na genge hilo.